3 лістапада, Мінск /Кар. БЕЛТА/. Старшыня праўлення Нацыянальнага банка і кіраўнік рабочай групы па дапрацоўцы праекта праграмы сацыяльна-эканамічнага развіцця да 2030 года Раман Галоўчанка расказаў у эфіры тэлеканала "Беларусь 1" аб ключавых прыярытэтах праграмы сацэканамразвіцця да 2030 года, паведамляе БЕЛТА.
"Адна з самых складаных задач у любым прагназаванні - зрабіць так, каб праграма была вертыкалізавана, або, як кажуць, каскадзіравана, каб верхнеўзроўневыя прыярытэты раскрываліся праз задачы, мэты і механізмы іх рэалізацыі і завяршаліся сістэмай ацэнкі дасягальнасці таго ці іншага параметра. Тут на першае месца мы ўсё ж ставім чалавека. Гэта, па-першае, паляпшэнне дэмаграфічнай сітуацыі, якая з'яўляецца сур'ёзным выклікам для эканомікі. Другі напрамак - развіццё чалавечага патэнцыялу", - адзначыў Раман Галоўчанка.
Дэмаграфічны блок звязаны са здароўем насельніцтва, нараджальнасцю, планаваннем. "Падтрымка сем'яў з дзецьмі, на наш погляд, павінна адыгрываць ключавую ролю. Таму што галоўная наша каштоўнасць - гэта працоўныя рэсурсы. Пералом існуючых негатыўных дэмаграфічных тэндэнцый, на наш погляд, павінен стаць адной з ключавых задач", - падкрэсліў кіраўнік Нацбанка.
Свет вакол вельмі хутка мяняецца, і новыя тэхналогіі з'яўляюцца вельмі хутка, звярнуў увагу ён. "Узяць той жа самы штучны інтэлект, наколькі хутка ён развіваецца і наколькі хуткімі тэмпамі развіваецца лічбавая эканоміка і яе ўклад у агульнаэканамічнае развіццё. Усё гэта немагчыма рабіць без падрыхтоўкі чалавека не толькі да жыцця, але і да работы ў гэтым свеце. Таму фокус на практыка-арыентаваную адукацыю, павышэнне прафесійнай кампаненты ў адукацыі таксама вельмі важныя. Аб гэтым гаварылі многія члены рабочай групы. Мадэрнізацыя нашай сістэмы адукацыі таксама закладзена ў праграме", - падзяліўся Раман Галоўчанка.
Кіраўнік рабочай групы падкрэсліў, што нікуды не дзецца ад павышэння канкурэнтаздольнасці і ўзроўню тэхналагічнасці нашай эканомікі. "Я бачу ключавым прыярытэтам рост затрат на навуку і распрацоўкі. На жаль, пакуль мы яшчэ не дасягнулі аптымальнага ўзроўню, і тут размова не толькі аб бюджэтных інвестыцыях у навуку, тут размова аб стварэнні, развіцці інавацыйна актыўных прадпрыемстваў. Гэта значыць тых, якія непасрэдна на вытворчасці робяць інавацыі, укараняюць іх у вытворчасць і атрымліваюць дабаўленую вартасць, - сказаў ён. Дзяржава павінна не проста паставіць такія задачы, але і павінна зрабіць прывабнай саму мадэль такой работы і стварыць неабходныя стымулы".-0-
