3 лістапада, Мінск /Кар. БЕЛТА/. Нацыянальнае агенцтва па турызме прадставіла каляндар падзейных мерапрыемстваў "Зіма ў Беларусі 2025/26". Аб гэтым паведамляе БЕЛТА са спасылкай на сайт установы.
Паколькі не за гарамі навагоднія і калядныя святы, большасць мерапрыемстваў прысвечаны менавіта ім. У многіх раёнах, нацыянальных парках, турыстычных аб'ектах, папулярных музеях падрыхтавалі тэматычныя праграмы. Адкрыюцца рэзідэнцыі Дзеда Мароза, Палескага Зюзі, дзеда Зімніка і бабы Завірухі, іншых казачных персанажаў.
Адна са значных падзей - старт зімовага сезона ў Белавежскай пушчы. У абласных цэнтрах, Мінску, райцэнтрах запланаваны шэсці Дзядоў Марозаў і Снягурачак, урачыстыя цырымоніі ўключэння агнёў на навагодніх ёлках, музычныя паказы, канцэрты, акцыі. У рэгіёнах гасцям прапануюць і навагоднія туры.
У снежні ў Брэсце адбудзецца міжнароднае адкрытае першынство горада "Навагодняя казка - 2025" па мастацкай гімнастыцы, у студзені - VІІ Міжнародны фестываль-конкурс "Арт-парад у Віцебску", міжнародны фестываль класічнай музыкі "Студзеньскія музычныя вечары" (Брэст), праваслаўны фестываль "Хрыстаславы-2026" (Слонім), пяты абласны зімовы фестываль-кірмаш "Берасцейскія сані" (Брэст).
У Астраўцы пройдзе міжрэгіянальны конкурс дзіцячых танцавальных калектываў "Свет танца - 2026", у Пінску - фестываль "Лютаўскія музычныя вечары", у Іўеўскім раёне - свята юшкі "Морынская залатая рыбка", у Лідскім раёне - рэгіянальны маладзёжны фестываль-конкурс эстраднай творчасці "Хрустальны звон", начны інтэрактыўны мультыжанравы фестываль #SUPREMШТОРМ_НОЧ у Віцебску.
У каляндар увайшлі і народныя абрады, прысвечаныя Калядам, Вадохрышчу, Масленіцы. У прыватнасці, турыстаў запрашаюць азнаёміцца з унікальным беларускім народным абрадам "Калядныя цары". Ён аб'яднаў элементы карнавалу і народнай драмы. Упрыгожваннем сталі самабытны фальклор, дэкаратыўна-прыкладное мастацтва (касцюм, прадметы побыту), асаблівыя калядныя стравы нацыянальнай кухні. Правядуць і рэканструкцыю старадаўняга навагодняга абраду Столінскага раёна "Конікі".
Падрабязны пералік мерапрыемстваў можна знайсці на сайце Нацыянальнага агенцтва па турызме.-0-
